Навука 25 (2856) 2021

Медыцынская секцыя Інстытута беларускай культуры пачала працу ў сакавіку 1924 года. Яе ўзначаліў Народны камісар аховы здароўя БССР Міхаіл Барсукоў, пад значным уплывам якога былі сфарміраваны задачы для навукоўцаў у справе пабудовы нацыянальнай сістэмы аховы здароўя. Даволі шырокі план дзейнасці ўключаў збор і навуковую апрацоўку матэрыялаў па гісторыі медыцыны; даследаванне мясцовых і так званых сацыяльных хвароб на Беларусі, вывучэнне клімату і яго ўплыву на здароўе насельніцтва; аналіз санітарна-бытавых умоў жыцця вёскі, мястэчка і горада ў БССР; антрапалагічнае даследаванне беларускага сялянства; навуковую распрацоўку лячэбных і санітарна-асветных пытанняў. Менавіта ў працы Медсекцыі Інбелкульта выразна праявілася адна з яго асаблівасцей: даследаванні праводзіліся сіламі вучоных, выкладчыкаў і дактароў, якія не з’яўляліся штатнымі супрацоўнікамі Інстытута, але ўзаемадзейнічалі з ім у якасці карэспандэнтаў. У 1925–1926 гадах за Медыцынскай секцыяй у каштарысе Інбелкульта адзначана толькі адна штатная адзінка намесніка старшыні секцыі. Пазаштатныя работнікі сферы аховы здароўя трымалі сувязь з Інбелкультам сродкамі ліставання, высылкі артыкулаў, выканання заданняў секцыі, выступлення з лекцыямі.

• Месца выхаду: Мінск
• Дата выхаду: 2021-06-22
• Рэдактар: Дубовік Сяргей
• Выдавец: НАН РБ
• Copyright: НАН РБ
• Кнігазбор: Kamunikat.org