25 кніг на 25-годдзе «Камунікату», 500 гадзін аўдыёкніг у вольным доступе! Размаўляем з Яраславам Іванюком
2025-04-04 20:27
Вельмі доўгі час «Камунікат» быў інтэрнэт-бібліятэкай. Яраслаў прызнае, што не думаў, што яму прыйдзецца выдаваць папяровыя кнігі.
Класік сучаснай беларускай літаратуры
Уладзімір Арлоў і журналіст, выдавец
Яраслаў Іванюк вярнуліся з пятага турнэ па еўрапейскіх гарадах. Яраслаў - таксама наш калега, ён супрацоўнічае з Беларускай рэдакцыяй Польскага радыё, ён завітаў да нас у студыю, каб расказаць пра прагу беларусаў у замежжы чытаць беларускае і знаёмства з вядомым пісьменнікам. «Камунікат» выдаў ужо 13 кніг Уладзіміра Арлова.
Гэта самая доўгая паездка: Познань, Уроцлаў і Варшава, Брно і Прага, Вена, Цюрых і тры гарады ў Германіі: Мюнхен, Вісбадэн і Кёльн.
- Для мяне гэта магчымасць расказаць пра «Камунікат», а Уладзімір Арлоў з ліку тых пісьменнікаў, для якіх сустрэча з чытачамі – вельмі важная. На іх могуць узнікнуць сюжэты для новых твораў, паяўляюцца новыя ідэі. Калі б не тое, што мы паехалі на сустрэчу ў Хельсінкі, дзе сустрэліся спадары Арлоў і Ушакоў, то не было б спектаклю паводле «Ордэну Белай мышы». Жадаючых сустрэцца з класікам беларускай літаратуры хапае. Гэта пісьменнік, якога пазнаюць на вуліцах еўрапейскіх гарадоў. Пасля адной з сустрэч у Гданьску побач праходзіла група маладзёнаў, якія пачалі шаптацца: Гэта Арлоў. Калі мы загаварылі, то яны расказалі, што ў Беларусі ніколі з пісьменнікам не сустрэліся, але вось тут у Гданьску.
На сустрэчу беларусы прыносілі «зачытаныя» кнігі Арлова, прывезеныя яшчэ з Беларусі. У Швейцарыі і Германіі на сустрэчу прыязджалі беларусы з розных гарадоў.
Інтэрнэт-бібліятэцы, якую заснаваў і ўзначальвае Яраслаў Іванюк, сёлета спаўняецца 25 гадоў. Да юбілею ён абяцае выдаць 25 кніг і хваліцца ажно 500 гадзінамі аўдыёкніг у вольным доступе!
Яраслаў прызнае, што не думаў, што яму прыйдзецца выдаваць папяровыя кнігі:
- Да гэтага мяне прымусіла сітуацыя. Я хачу падкрэсліць, што «Камунікат» не паявіўся ніадкуль. Ён з’явіўся дзякуючы Беларускай рэдакцыі Польскага радыё ў Варшаве. З гэтага ўсё пачалося, калі ў 2000 годзе я перавёў у інтэрнэт бюлетэнь нашай рэдакцыі.
На разважанні пра фінансавыя цяжкасці, з якімі апошнім часам сустракаюцца беларускія арганізацыі, у тым ліку культурніцкія і асветніцкія, Яраслаў кажа: Не разбіць, не спыніць, не стрымаць. А цяжкасці лічыць часовымі.