Адна з кніг Фонда Kamunikat.org - у шорт-лісце прэміі імя Францішка Багушэвіча!

2025-03-21 20:24

У дзень нараджэння Францішка Багушэвіча і ў Сусветны дзень паэзіі Беларускі ПЭН прэзентаваў кароткі спіс намінантаў на аднайменную прэмію. Маецца тут і адна з кніг выдавецтва Kamunikat - "Кніга могілак. Беларускія пахаванні ў свеце" пад аўтарствам Наталлі Гардзіенкі і Лявона Юрэвіча.

Выданне паказвае, наколькі няпроста да канца заставацца беларусам. І адказвае на пытанне, дзе ў свеце больш памяці пра памерлых беларускіх дзеячоў: дома ці ў эміграцыі? Маюцца на ўвазе помнікі. Адна справа - быць свядомым беларусам самому, іншая - мець беларускамоўную сям'ю, вучыць роднай мове дзяцей, нават у эміграцыі. І знайсці супакой пад помнікам на роднай мове.

Працу "Кнігай могілак..." распачаў у Нью-Ёрку архівіст Лявон Юрэвіч 25 гадоў таму. Пазней да стварэння альбома-даведніка далучылася гісторык Натальля Гардзіенка, а выдаў кнігу Фонд «Камунікат». 550 старонак, сотні чорна-белых і каляровых ілюстрацый. Салідны фаліянт ахоплівае беларускія пахаванні ў 13 краінах свету, у тым ліку падрабязна апісвае адмысловыя беларускія могілкі або беларускія часткі шматнацыянальных могільнікаў у Аўстраліі, Вялікабрытаніі, ЗША, а таксама паасобныя надмагіллі беларусаў і ўраджэнцаў Беларусі ў Бельгіі, Германіі, Грэцыі, Даніі, Італіі, Канадзе, Францыі, Чэхіі, Чылі, Швецыі.

Прэмія Францішка Багушэвіча ўзнагароджвае творцаў, якія аднаўляюць гістарычную памяць і ўмацоўваюць беларускую ідэнтычнасць.

Крыніца: Камунікат

Камунікат.org – Беларуская Інтэрнэт-Бібліятэка

Пры выкарыстаньні матэрыялаў у друку спасылка на крыніцу інфармацыі абавязковая.
Пры выкарыстаньні матэрыялаў у Інтэрнэце прамая гіпэрспасылка на Kamunikat.org абавязковая.
Ідэя сайту Яраслаў Іванюк