Алесь Бяляцкі: Улады выразна дэманструюць свае адносіны да Курапатаў

2020-11-01 18:35

:/:

32 гады таму, 30 кастрычніка 1988 году, тысячы чалавек зладзілі шэсце ў Менску да ўрочышча Курапаты, дзе ў 30-я мінулага стагоддзя гады супрацоўнікі НКВД вынішчылі тысячы невінаватых людзей.

Паводле розных падлікаў, карнікі НКВД расстралялі ў Курапатах з 1937 па 1941 гады ад 30 тысяч (першае следства, што вяла пракуратура БССР) да 250 тысяч чалавек.

Сёння ў маршы на Курапаты ідзе праваабаронца Алесь Бяляцкі, які памятае тыя часы:

– Гэтым шляхам, дарэчы, ішоў ход, калі ўсталёўвалі Крыж пакуты ў 1989 годзе, я добра памятаю, менавіта па Карбышава ішла тады калона з Крыжам наперадзе, які потым усталявалі ў Курапатах. І зараз мы паўтараем гэты пакутны шлях, але зусім з іншымі адносінамі ўладаў. Бо ў 1989 годзе ўсё ж такі не чапалі дэманстрацыі. Пасля разгону Дзядоў у 1988 годзе фактычна да 1995 года дэманстрацыі і мітынгі праходзілі ў Беларусі амаль без затрыманняў, амаль без праблемаў.

На жаль, сённяшняя сітуацыя адваротная – масавыя рэпрэсіі, затрыманні, ужыванне спецсродкаў. Лукашэнка некалькі разоў казаў, што ўсё адбываецца паводле яго загаду.

Беларускае Радыё Рацыя

Крыніца: Беларускае Радыё Рацыя

Камунікат.org – Беларуская Інтэрнэт-Бібліятэка

Пры выкарыстаньні матэрыялаў у друку спасылка на крыніцу інфармацыі абавязковая.
Пры выкарыстаньні матэрыялаў у Інтэрнэце прамая гіпэрспасылка на Kamunikat.org абавязковая.
Ідэя сайту Яраслаў Іванюк