«Для ўсіх актыўных беларусаў, якія не здаюцца». На ютубе выйшаў анімацыйны фільм пра правы чалавека

2024-09-04 16:10

Анімацыйны фільм «Правы чалавека» ад сёння даступны для вольнага прагляду. Асноўная яго ідэя — у гульнявой форме распавесці пра правы чалавека. Аўтары анімацыйнага фільма — Ната Карнеева (адзін з рэжысёраў і аўтар малюнкаў) і Эльдар Мусін (другі рэжысёр, гукарэжысёр, аўтар анімацыі).

Сцэнарыстамі выступілі праваабаронцы з HUMAN RIGHTS IMPACT.

«Працаваць над фільмам мне было цікава, хаця і не заўсёды проста. З рэжысурай мне вельмі дапамог аніматар, з якім мы ўжо працавалі над маім аўтарскім праектам SHIREY MARA», — распавяла Ната Карнеева.

Паводле яе, «менавіта Эльдар вызначыў асноўныя мізансцэны гэтага фільма і ўдыхнуў жыццё ў малюнкі, анімаваўшы іх».

«Работа з адукацыйным кантэнтам — гэта новы для мяне досвед, і я буду рада, калі наш анімацыйны фільм пабачаць людзі», — адзначыла аўтарка.

«Беларусам важна ведаць і разумець што такое правы чалавека і як неабходна абмяжоўваць уладу ў дзяржаве. Шлях да вяртання свабоды і правоў чалавека пачынаецца з разумення гэтых правоў і як яны павінны працаваць», — адзначыў кіраўнік HUMAN RIGHTS IMPACT, праваабаронца Раман Кісляк.

Паводле яго, беларускія праваабаронцы хочуць засвоіць новыя формы адукацыі ў сферы правоў чалавека: анімацыйныя фільмы і коміксы.

«Гэты мультыплікацыйны фільм — фактычна анімацыя часткі лекцыі аб правах чалавека. Ён разлічаны на актывістаў беларускай грамадзянскай супольнасці і ўсіх актыўных беларусаў, якія не здаюцца», — дадаў Раман Кісляк.

Крыніца: Будзьма беларусамі!

Камунікат.org – Беларуская Інтэрнэт-Бібліятэка

Пры выкарыстаньні матэрыялаў у друку спасылка на крыніцу інфармацыі абавязковая.
Пры выкарыстаньні матэрыялаў у Інтэрнэце прамая гіпэрспасылка на Kamunikat.org абавязковая.
Ідэя сайту Яраслаў Іванюк