Галоўны рэдактар «Новага часу» Аксана Колб асуджана на 2,5 гады «хіміі»

2022-06-15 14:57

Галоўны рэдактар "Новага часу" Аксана Колб асуджана на 2,5 гады "хіміі" з накіраваннем у папраўчую ўстанову адкрытага тыпу (менавіта такі тэрмін і патрабаваў пракурор).

Яе прызналі вінаватай у "арганізацыі і падрыхтоўцы дзеянняў, якія груба парушаюць грамадскі парадак або актыўным удзеле у іх". Колб паставілі ў віну ўдзел у масавым вулічным шэсці ў Мінску 16 жніўня 2020-га.

Працэс праходзіў у судзе Цэнтральнага раёна Мінска (суддзя — Дзмітрый Карсюк). Ад апошняга слова Аксана Колб адмовілася.

Колб затрымалі раніцай 20 красавіка 2022-га. Сілавікі прыйшлі да яе ў кватэру з... кувалдамі і шчытамі. Неўзабаве было выстаўлена абвінавачванне, і Аксану Колб перавялі з Акрэсціна ў СІЗА № 1 на Валадарскага. Праваабаронцы прызналі яе палітзняволенай.

Колб вызвалілі ў зале суда да накіравання адбыцця тэрміна.

Газета "Новы Час" перастала выходзіць у жніўні 2021 года. Яе сайт novychas.by быў заблакаваны ў нашай краіне ў кастрычніку мінулага года. Пасля гэтага з'явіўся сайт novychas.online.

Аксана Колб узначаліла выданне ў 2015-м. Яна прынцыпова вырашыла застацца ў Беларусі ў перыяд рэпрэсій.

Крыніца: Еўрарадыё

Камунікат.org – Беларуская Інтэрнэт-Бібліятэка

Пры выкарыстаньні матэрыялаў у друку спасылка на крыніцу інфармацыі абавязковая.
Пры выкарыстаньні матэрыялаў у Інтэрнэце прамая гіпэрспасылка на Kamunikat.org абавязковая.
Ідэя сайту Яраслаў Іванюк