«Гульні Цырцэі» Змітра Дзядзенкі сталі прызёрам прэміі Гедройця

2025-11-15 20:35

Журы адзначыла выдадзеную Фондам Kamunikat.org кнігу Змітра Дзядзенкі «Гульні Цырцэі» «за асэнсаванне гістарычнай повязі часоў у вострасюжэтнай форме».

Прыз – выданне наступнай кнігі пры падтрымцы Міжнароднага саюза беларускіх пісьменнікаў.

Коратка пра кнігу: Ворша, 1920 год. Забіты стары князь Друцкі, а ягоныя каштоўнасці зніклі. Шукае іх малады чэкіст Раман Васільчук, якому дапамагае былы следчы Павел Дадэрка. Тым часам навокал успыхваюць сялянскія бунты і рабочыя паўстанні, дзейнічаюць рабаўнікі-анархісты, шпіёны Пілсудскага і секс-шантажысты з дома цярпімасці… А паралельна даросламу свету ўзнікае дзіцячае каралеўства з сапраўдным імператарам. Але яно таксама аказваецца ўцягнутае ў жорсткае дарослае супрацьстаянне.

Кнігу можна замовіць з высылкай па ўсім свеце на сайце Kamunikat.shop

II месца прэміі Гедройця – Югася Каляда, аўтарка кнігі «Перамена месцаў».

Аўтарка ўзнагароджана за фантасмагарычнае адлюстраванне зрухаў у беларускім грамадстве творчай стыпендыяй і месяцам працы на шведскім востраве Готланд. Прыз забяспечыў суарганізатар прэміі – Міжнародны саюз беларускіх пісьменнікаў.

I месца прэміі Гедройця – Сяргей Дубавец, аўтар кнігі «Занзібар: сталеньне маладой душы».

Рашэннем журы аўтар узнагароджаны за філасофскую рэфлексію над пошукамі нацыянальнай ідэнтычнасці свайго пакалення. Пераможца атрымаў галоўную ўзнагароду пры падтрымцы Фонду міжнароднай салідарнасці.

У кароткім сьпісе прэміі было 6 твораў:

«Гульні Цырцэі. Раман» — Зьміцер Дзядзенка;
«Занзібар. Сталеньне маладой душы»— Сяргей Дубавец;
«Перамена месцаў» — Югася Каляда;
«Там, дзе няма цемнаты: Радыё Свабода» — Аляксандр Лукашук;
«Раз на дваццаць пяць тысяч гадоў» — Анка Упала;
«Забойства на вуліцы Макаёнка» — Клёк Штучны.

Урачыстае ўручэньне штогадовай Літаратурнай прэміі імя Ежы Гедройця адбылося ў Еўрапейскім Цэнтры Салідарнасці ў Гданьску.

Арганізатары прэміі: Беларускі ПЭН, Міжнародны саюз беларускіх пісьменнікаў.
Арганізатары спадарожных падзей: Беларускі ПЭН, Беларускае культурнае таварыства «Хатка», Міжнародны саюз беларускіх пісьменнікаў, Еўрапейскі цэнтр салідарнасці, Польскі ПЭН-клуб.
Партнёры цырымоніі: выдавецтва аўдыякніг Audiobook.by, Reform.news, Еўрапейскае радыё для Беларусі, Numar8Production.
Праект фінансаваны ў рамках праграмы польскага супрацоўніцтва дзеля развіцця Міністэрства замежных спраў Рэспублікі Польшча

Крыніца: Kamunikat.org

Камунікат.org – Беларуская Інтэрнэт-Бібліятэка

Пры выкарыстаньні матэрыялаў у друку спасылка на крыніцу інфармацыі абавязковая.
Пры выкарыстаньні матэрыялаў у Інтэрнэце прамая гіпэрспасылка на Kamunikat.org абавязковая.
Ідэя сайту Яраслаў Іванюк