Івонка Сурвілла павіншавала Беларускую інтэрнэт-бібліятэку Kamunikat.org з 25-годдзем!

Шчыра віншую ўсіх заснавальнікаў, супрацоўнікаў і чытачоў Беларускай Інтэрнэт-Бібліятэкі Kamunikat. org зь яе 25-ці годзьдзем!

Чвэрць стагодзьдзя — тэрмін, які дазваляе падсумаваць вынікі. Сёньня відавочна, што значнасьць установы Kamunikat. org, офіс якой месьціцца ў Беластоку, даўно перайшла межы Падляшша і Польшчы.

Беларуская нацыя перажывае сёньня бадай што самыя цяжкія часы за апошнія дзесяцігодзьдзі, а маштаб і інтэнсіўнасьць разбурэньня культуры, зьнішчэньня нацыянальных каштоўнасьцяў увогуле ні з чым не параўнальны на памяці цяпер жывучых пакаленьняў.

Ва ўмовах, калі прамаскоўскі рэжым зьнішчае ўсё беларускае ў Беларусі, вельмі важнымі робіцца ініцыятывы беларусаў у вольным сьвеце. І Інтэрнэт-Бібліятэка Kamunikat. org ёсьць цудоўным прыкладам мэтанакіраванай і пасьлядоўнай працы. 

Сёньня гэта ня толькі свабоднае і адкрытае сховішча носьбітаў беларускага слова, выданьняў мастацкай, навуковай і дакумэнтальнай літаратуры, беларускай пэрыёдыкі. 

Kamunikat. org — і выдавец, і асьветнік на ніве беларушчыны.

Рада БНР высока цэніць унёсак Інтэрнэт-Бібліятэкі Kamunikat. org у беларускую справу, сьведчаньнем чаго ёсьць узнагароджаньне яе заснававльніка і кіраўніка Яраслава Іванюка Мэдалём Ордэну «Пагоні».

Дык віншую ўсіх вас з выдатным юбілеем і жадаю плёну ў вашай выскароднай справе на карысьць нацыянальнага Адраджэньня!

20 чэрвеня 2025

Атава.