Kamunikat.shop альбо шоп ад Камуніката ў Цэнтры Беларускай Салідарнасці ў Варшаве

— Камунікат доўгі час працаваў выключна як інтэрнэт-бібліятэка. І гэтая інтэрнэт-бібліятэка ў мінулым годзе адзначыла 25-годдзе. У 2021 годзе мы пачалі таксама друкаваць кнігі, пачынаючы з рамана Уладзіміра Някляева «Гэй Бэн Гіном». За гэты час мы выдалі больш за 70 беларускіх кніг у папяровай форме — гэта і мастацкая літаратура, і гістарычная, і кнігі для дзяцей, і нон-фікшн. Частка кніг — новыя, частка — перавыданні.

І цяпер настаў момант, калі пасля продажаў у інтэрнэце, на розных кірмашах і аўтарскіх сустрэчах, мы вырашылі адкрыць стацыянарную кропку ў Варшаве. Там сапраўды вельмі шмат беларусаў, і разам з Цэнтрам Беларускай Салідарнасці мы вырашылі, што кнігарня будзе менавіта ў іх сядзібе.
Яна будзе называцца «Kamunikat.shop», і там будуць прадавацца кнігі не толькі выдавецтва Камунікат, але і іншых беларускіх выдавецтваў, якія працуюць за мяжой. Складана сказаць, калі мы дасягнем стану, што там будуць прадстаўлены ўсе — бо такіх выдавецтваў ужо больш за 20 — але асноўныя з іх будуць даступныя ад разу для ўсіх ахвотных па адрасе ul. Oleandrów 6 у Варшаве. Гэта недалёка метро «Палітэхніка», літаральна тры хвіліны пешшу.

Там будуць кнігі «Kamunikat», выдавецтва «Гутэнберг» з Кракава, «Янушкевіч» з Варшавы, «Логвінаў» з Вільні, «Skaryna Press» з Лондана, «Вясна» з Прагі, «Мяне няма» з Варшавы. Таксама будуць кнігі беларускай нацыянальнай меншасці — Праграмнай рады тыднёвіка «Ніва» і «Музея малой бацькаўшчыны» ў Студзіводах, якім кіруе Дарафей Фіёнік.

Гэта тое, што будзе дакладна з заўтра. Паступова мы будзем пашыраць асартымент кнігамі іншых беларускіх выдавецтваў. На дадзены момант у нас будзе больш за 500 назваў беларускіх кніг.

— Калі інтэрнэт-бібліятэку можна адкрыць у любы час, як будзе працаваць кнігарня ў Варшаве?

— Гэта стане дакладна вядома ўжо заўтра, бо будзе прызначаная асоба, адказная за кантакт з пакупнікамі і продаж кніг. Але ўжо цяпер можна сказаць, што кнігарня будзе працаваць у пасляабедзенныя гадзіны з аўторка да пятніцы. Паколькі Цэнтр Беларускай Салідарнасці праводзіць шмат сваіх імпрэз у суботу — розныя майстар-класы, заняткі для дзяцей — у суботу кнігарня, магчыма, будзе працаваць нават восем гадзін.

Так што кожны, хто захоча набыць беларускую кнігу, знойдзе час, каб прыйсці і яе купіць.

— Якія кнігі вы цяпер можаце параіць чытачам? Якія навінкі?

— Пра навінкі магу казаць толькі ад «Kamunikat». Нядаўна, на Беластоцкім кніжным кірмашы, мы выдалі кнігу «Незавершанасьць» Алеся Лукашука — былога кіраўніка беларускай службы «Радыё Свабода». Гэта паэтычная, крыху філасофская кніга, кніга пра філасофію жыцця.

Таксама выйшла кніга Уладзіміра Арлова — перавыданне першай часткі «Імёны свабоды» ў падарункавым фармаце, у цвёрдай вокладцы.

Будуць і навінкі іншых выдавецтваў — кожны, хто прыйдзе ў кнігарню, атрымае інфармацыю пра іх.

Асабліва я б цяпер рэкамендаваў кнігу паэзіі Насты Кудасавай «Лірыка». Яна выйшла ў лютым у серыі «Паэты планеты». Раней у гэтай серыі друкаваліся толькі мужчыны, а тут — паэтка. На мой погляд, адна з найлепшых прадстаўніц маладога пакалення беларускіх літаратараў.

Мы толькі што вярнуліся з туру з Настай — былі ў Беластоку, Вільні, Рызе, Таліне — і ўсюды кніга і сама аўтарка выклікалі вялікую цікавасць. Людзі слухалі вершы, і часам аж дрыжыкі праходзілі. Таму гэтую кнігу я асабліва раю.

— Ці плануюцца далейшыя паездкі?

— Камунікат у мінулыя гады разам з Уладзімірам Арловым наведаў 15 еўрапейскіх краін. Мы сапраўды шмат ездзім на сустрэчы і заўсёды бярэм з сабой увесь асартымент кніг.

Найбліжэйшая падзея — гэта, канешне, адкрыццё кнігарні ў Варшаве, куды ўжо дастаўлены ўсе кнігі. Потым — Варшаўскі кніжны кірмаш, які сёлета адбудзецца 27–31 мая на Нацыянальным стадыёне. Гэта будзе вялікая імпрэза з удзелам Нобелеўскага лаўрэата Алеся Бяляцкага.

Таксама крыху раней, бо 15 мая, разам з Уладзімірам Арловым мы паедзем у Вроцлаў, дзе будзем прэзентаваць кнігу «Каласы пад сярпом тваім» Уладзіміра Караткевіча. На жаль, не магу гарантаваць, што яна будзе даступная ў кнігарні на Oleandrów 6 у Варшаве — наклад ужо амаль вычарпаны, засталіся толькі асобнікі для прэзентацыі ва Уроцлаве.