Па кнізе Алексіевіч «У вайны не жаночае аблічча» ў Галівудзе хочуць зьняць сэрыял

Па кнізе беларускай пісьменьніцы, нобэлеўскай ляўрэаткі Сьвятланы Алексіевіч «У вайны не жаночае аблічча» плянуюць зьняць сэрыял

Пра гэта ў Facebook напісаў выдавец кніг пісьменьніцы Барыс Пастарнак.

Паводле Пастарнака, ужо падпісаная дамова аб здымках сэрыялу. Ён дадаў, што пасьля посьпеху сэрыялу «Чарнобыль» ад амэрыканскай стрымінгавай кампаніі HBO, шмат у чым заснаванага на кнізе Алексіевіч «Чарнобыльская малітва», за правы на новы сэрыял разгарнулася міжнародная канкурэнцыя.

Сама Сьвятлана Алексіевіч у інтэрвію парталу «Зеркало» пацьвердзіла, што некалькі буйных галівудзкіх студый сапраўды праявілі цікавасьць да здымкаў, а ў адной з роляў плянавалася задзейнічаць Анджаліну Джалі. Пра сцэнар пакуль нічога не вядома — сама аўтарка не бярэ ўдзелу ў яго напісаньні.

Аднак з пачаткам вайны ва Ўкраіне, па словах Алексіевіч, праект паставілі на паўзу, і, хоць пра яго адмену гаворкі не ідзе, будучыня сэрыялу пакуль застаецца незразумелая. Пісьменьніца выказала спадзеў, што ў далейшым усё складзецца «гэтак жа добра, як пачыналася» — улічваючы, што аповесьць пра жанчын на вайне цяпер набывае новую актуальнасьць.

Партал «Зеркало» таксама паведаміў са спасылкай на прадстаўніка Міністэрства культуры, што кнігі Алексіевіч міністэрства накіравала ў адмысловую камісію дзеля праверкі, ці ня ўтрымліваюць яны экстрэмісцкага зьместу.