Праваабаронца Таццяна Гацура пакінула Беларусь

Пра свой ад'езд на асабістай старонцы ў Facebook паведаміла грамадcкая актывістка і праваабаронца, дырэктарка ліквідаванага ўладамі асветніцка-сацыяльнага грамадскага аб'яднання «Звяно».

Таццяна Гацура напісала сярод іншага:

«Дарагія сябры, я ва Украіне. Выехала нелегальна.

Вайна радыкальна памяняла і нашу агульную, і маю ўласную сітуацыю. Мая сям'я рэзка апынулася ў рэальнай небяспецы, на вайне, з нявызначанай будучыняй, а таму мае патрэбу ў маёй прысутнасці і падтрымцы. За тыдзень вайны я зразумела, што не магу не быць з імі побач у гэтай бядзе.

І, канешне, не магу не быць яшчэ адным салдатам на ўкраінскім фронце ў гэтай нашай агульнай вайне. Пра салдата пакуль не літаральна, але я ехала з планам, што і як магу рабіць тут на карысць і ўкраінцам, і беларусам, маю намер стаць часткай беларускага супраціву тут.

Таму што (і не толькі) зараз зрынуць рэжым Лукі магчыма толькі пасля перамогі Украіны.

Не да канца яшчэ ўсвядоміла, што я тут. Сірэну паветранай трывогі, якая ўключаецца на мабільным, мозг успрымае, як тэлефонны званок… Не ведаю, што чакае далей, але я мае намер працаваць на агульную перамогу, выжыць і вярнуцца.

Мы справімся. Мы справімся з Лукой і справімся з Пуціным, і справімся з нашымі стасункамі з украінцамі».

У красавіку 2021 на Таццяну завялі крымінальную справу па артыкуле 342 КК РБ (Арганізацыя дзеянняў, што груба парушаюць грамадскі парадак). У рамках гэтай справы таксама затрымлівалі мужа Тацяны, вядомага ўкраінскага праваабаронца Уладзіміра Яворскага. Падчас затрымання яго збівалі, каб атрымаць паролі ад тэлефонаў, пагражаючы змяшчэннем дзяцей у прытулак, а пасля вымусілі з’ехаць з Беларусі на працягу 48 гадзін.