У Варшаве пройдзе фестываль нямога кіно і жывой музыкі пад адкрытым небам. Яго арганізатары — беларусы

Пра падзею сёння абвясціла кінакрытык Ірэна Кацяловіч, якая спрычынілася да новай імпрэзы. У камандзе стваральнікаў фэсту — кампазітарка Вольга Падгайская і музыкант Віталь Эпаў. Падтрымлівае праект Мацей Радзівіл.

«У еўрапейскіх краінах бачная вялікая павага і інтарэс да нямых стужак — мы паглядзелі на гэта і вырашылі зрабіць яшчэ адно свята кіно ды музычнай інтэрпрэтацыі ў польскай афішы», — адзначыла Ірэна Кацяловіч.

Фэст пазіцыянуецца як бязгучнае кіно пад жывую музыку кампазітараў з Беларусі і Польшчы.

Сярод музыкаў, якія будуць удзельнічаць у першай эдыцыі «Нямой ліхаманкі»: польскія творцы Дарыюш Пшыбыльскі, Аляксандра Хмелеўска, Філіп Спорняк і беларускія — Вольга Падгайская і Five-Storey Ensemble.

Назвы фільмаў пакуль не агучаны, але вядома, што гэта будуць чатыры карціны з розных краін — з Польшчы, Германіі, Украіны і Беларусі. (Знаўцы могуць разгадаць кіно па кадрах на афішы).

Ірэна Кацяловіч «раскрыла карты», анансаваўшы беларускую карціну-ўдзельніцу — гэта нямая стужка «Прастытутка» Алега Фрэйліха — па адной з версій, першы беларускі фільм. Сацыяльная драма была выпушчана на экраны ў 1926 годзе кінакампаніяй «Белгоскино».

Квіткі на сеансы з’явяцца неўзабаве. Нагадаем, што месца сустрэчы — утульны дворык Музея Вольнай Беларусі ў Варшаве (вуліца Фоксаль, 11).

Сачыць за імпрэзай можна тут.