Уладзімір Някляеў: Што б не казалі, не плялі — мы на зямлі, а не ў зямлі!

2024-10-22 14:54

:/:

На ўроцлаўскім фестывалі беларускай культуры паэт Уладзімір Някляеў прэзентуе сваю новую кнігу «Без айчыны».

Ва Уроцлаве завяршаецца XII Фестываль незалежнай беларускай культуры. Праграма налічвала больш за 20 імпрэз, у тым ліку тэатральныя паказы, экскурсіі, адкрытыя дыскусіі ды іншае.

Кульмінацыя фестывалю — літаратурная сустрэча «Што далей з літаратурай», у якой прымаюць удзел пісьменнікі Святлана Курс, Наста Кудасава, Уладзімір Някляеў, які прэзентуе сваю новую кнігу «Без айчыны»:

— Пры ўсіх нашых розных лёсах, рознай мінуўшчыне і будучыні ўсе мы думаем пра тое, што будзе з намі ў Айчыне, і што будзе з Айчынай у нас. Вельмі складаны час, і пра гэта я паспрабаваў расказаць такім чынам, каб гэта лягло на душу і сэрца тым людзям, якія будуць чытаць гэтую кнігу, і тым якія будуць слухаць урыўкі падчас фестывалю ва Уроцлаве.

— Магчыма, адказ у вашай кнізе, але запытаю ў Вас цяпер: ці верыце, што вы і вашыя чытачы, агулам беларускія ўцекачы, калісьці вернуцца дадому, а менавіта ў беларускую Беларусь?

— Што б з намі не было, нельга ні ў якім разе страчваць надзею, бо гэта страта будучыні страта жыцця. Я проста веру ў тое, што Беларусь нікуды не падзенецца. Ужо колькі гадоў, колькі стагоддзяў яе знішчаюць, затоптваюць; кажуць, што яе няма, няма мовы, няма культуры, няма нас — беларусаў… А мы ёсць! У маёй кнізе ёсць такі вершык: Што б не казалі, не плялі/Мы на зямлі, а не ў зямлі! Так яно і будзе.

Ілюстратарам кнігі Ул. Някляева «Без айчыны» стала мастачка Аляксандра Канафальская.

эж

Крыніца: Беларуская служба Польскага радыё

Камунікат.org – Беларуская Інтэрнэт-Бібліятэка

Пры выкарыстаньні матэрыялаў у друку спасылка на крыніцу інфармацыі абавязковая.
Пры выкарыстаньні матэрыялаў у Інтэрнэце прамая гіпэрспасылка на Kamunikat.org абавязковая.
Ідэя сайту Яраслаў Іванюк