Кніга паэзіі на трох мовах. «Маланкі над Вільняй» Ванды Марцін душ Рэйш

2023-11-15 16:00

Адным з выдаўцоў трохмоўнай кнігі Ванды Марцін душ Рэйш стаў Kamunikat.org. Кніга паэзіі "Маланкі над Вільняй" была выдадзены на беларускай, польскай і літоўскай мовах да 700-годдзя гэтага цудоўнага мультыкультурнага горада, сталіцы Літвы.

Ідэя кнігі належыць Альме Лапінскене, яна ж - перакладчык на літоўскую мову.

Пераклад на польскую зроблены Аляксандрам Сняжко, а пранікнёны ўступ да кнігі напісаў Сяргей Харэўскі.

Новая кніга Ванды Марцінш душ Рэйш - гэта насамрэч шыкоўны падарунак паэткі да юбілею роднага горада!

У СТАРЫМ ГОРАДЗЕ

Зноў збуцьвелае лісце ўкрывае двары.

Зімнавата блукаць апаўночы.

У абдымкі да віленскіх вулак старых

Цягнуць з дому цікаўныя вочы.

Чый па чорнаму бруку скакаў скакунец?

І чые тут стаяць камяніцы?

Хто выходзіў на гэны шыкоўны гаўбец

Хараством падзівіцца сталіцы?

На барочныя вежы падступна гады

Наваліліся цяжка, як жорны.

Праслізнуў ля муроў сам Радзьвіла Руды,

А як цень ён - дык, можа, і Чорны.

У змрочнай часу гульні чую скрып ліхтара,

Плач паточаных шашалем крокваў.

Дрэмле здумліва цёмная студня двара

І падслепыя сцены без вокнаў.

Выбух гукаў і пахаў вяртае назад.

Горне жаль. Час дадому, няйначай...

Кружыць мокрае лісце руды лістапад

І скавыш, як пакіданка, плача.

Мы маем аўтарскую старонку Ванды Марцін душ Рэйш на сайце бібліятэкі - завітвайце!

Замовіць кнігу "Маланкі над Вільняй" можна тут.

Фота Ванды Марцін душ Рэйш і з сайта bellit.info.

Крыніца: Камунікат

Камунікат.org – Беларуская Інтэрнэт-Бібліятэка

Пры выкарыстаньні матэрыялаў у друку спасылка на крыніцу інфармацыі абавязковая.
Пры выкарыстаньні матэрыялаў у Інтэрнэце прамая гіпэрспасылка на Kamunikat.org абавязковая.
Ідэя сайту Яраслаў Іванюк