Зьявілася аўдыёвэрсія сэрыі кніг нобэлеўскай ляўрэаткі Сьвятланы Алексіевіч «Галасы Ўтопіі»

2023-12-14 17:04

Супольнымі намаганьнямі Міжнароднага саюзу беларускіх пісьменьнікаў і фонду Kamunikat стварылі аўдыёвэрсію сэрыі кніг беларускай пісьменьніцы Сьвятланы Алексіевіч, ляўрэаткі Нобэлеўскай прэміі ў літаратуры 2015 году.

«Галасы Ўтопіі» складаюцца зь пяці кніг: «У вайны не жаночы твар», «Апошнія сьведкі», «Цынкавыя хлопчыкі», «Чарнобыльская малітва» і «Час сэканд-хэнд». Унікальнасьць сэрыі ў тым, што найноўшае выданьне аўтарка дапоўніла запісамі з уласнага дзёньніка і новымі гісторыямі, а таксама скасавала праўкі цэнзараў.

Агучылі аўдыёкнігі прафэсійныя акторы Алег Гарбуз, Алена Баярава, Сяргей Чуб і Крысьціна Дробыш.

«Хочам мы гэтага ці не, але гісторыя паўтараецца. Яна можа зьмяняць час, месца, але сутнасьць застаецца той жа. Тое, што ёсьць у кнігах Сьвятланы Алексіевіч, — яно вось тут цяпер, з намі. А некаторыя былі для мяне як погляд у будучыню. Гэта трэба пачуць цяпер, каб убачыць, наколькі іншай ёсьць гісторыя таго, што, здавалася, расказаная з усіх бакоў. Наколькі яна актуальная цяпер. Да дрыжыкаў», — кажа Крысьціна Дробыш.

Аўдыёкнігі можна паслухаць на любой зручнай пляцоўцы, спасылкі тут:

«У вайны не жаночы твар» (пераклад Валянціна Акудовіча);

«Апошнія сьведкі» (пераклад Барыса Пятровіча);

«Цынкавыя хлопчыкі» (пераклад Андрэя Хадановіча);

«Чарнобыльская малітва» (пераклад Уладзімера Арлова);

«Час сэканд хэнд» (пераклад Сяргея Дубаўца).

Крыніца: Радыё Свабода

Камунікат.org – Беларуская Інтэрнэт-Бібліятэка

Пры выкарыстаньні матэрыялаў у друку спасылка на крыніцу інфармацыі абавязковая.
Пры выкарыстаньні матэрыялаў у Інтэрнэце прамая гіпэрспасылка на Kamunikat.org абавязковая.
Ідэя сайту Яраслаў Іванюк